حاجتين فى الشعب المصري نفسى ماشفهومش

فى رحلتى اللى فاتت وانا رايح ادًرب فى حلوان فى شركة الحديد والصلب قابلت طبعا اشكال والوان من الناس المحترم والغير .. لكن انا هتكلم عن بعض الصفات المش كويسه علشان لازم نغير الصفات دى , والأغرب من كده كان ان الصفات دى متكرره بمعنى انى كنت بشوفها كل يوم او يمكن اكتر من مره فى اليوم الواحد .

( اضغط على الصوره لتكبيرها ) الصوره منقوله من مدونة مصطفى

منها مثلا ان الجبن المدفون فى بعض الشخصيات زى مثلا تلاقى سواق الميكروباص ماشى براحته تلاقى واحد جنبك يقول بصوت ضعيف " واطى "

دا انت رخم

وبعدين مثلا السواق يركن علشان يحمل زياده او مثلا يمون بنزين وينزل من الميكروباص تلقى الراجل بصوت عالى وكأن الشجاعه أخدته والأرنب اتحول لأسد ويزأر ويقول بعلو صوته

ايه ياعم الرخم دا انت سواق على ماتفرج محلتش تمون الا الوقتى يارخم

وبعد ما السواق يرجع ويركب الميكروباص يرجع الأسد للأرنب " الصوره الأصليه " ويقوله وكأنه بيشتكى لرجل مهم بصوت ضعيف وخافت

يلا ياريس ورانا مصالح ربنا يستر طريقك

حاجه خطيره جدا بأه كنت بستغرب منها كل اما أقرأها ومصدقهاش وهى ان انت لما تسأل حد على مكان يقولك ايه

انت شكلك غريب طالما ان انت بتسأل على المكان ده امشى شمال على طول هتلقى المكان اللى انت عايزه

لكن لما تمشى وتروح شمال وتسأل تانى على المكان الفلانى تلقى واحد تانى يرد عليك ويقولك انت

ايه اللى جابك هنا يابنى مين الحمار اللى قالك كده يابنى امشى يمين يابنى واسأل تانى

وطبعا هو كده غلط لما شتم الراجل التانى لكنه دلنى على الطريق الصحيح بعد ما طلعت عينى وحسبنا الله ونعم الوكيل .
لكن فى النهايه ياجماعه مش معنى ان السواق تعبان ليل ونهار وبتعامل مع الاف البشر - على الرغم انه مش عذر - لكن المفروض نأخذ له العذر , اما بالنسبه للناس اللى بدل الناس على الطريق الخطأ مش عارف آخذ لهم العذر بأى سبب يمكن تعبان وجاى من الشغل ومش شايف حاجه لكن برده لقيتله عذر وهو ان لازم نسأل أكتر من واحد , لكن عموما ياريت ياريت مندلش حد على الطريق غير مانكون عارفين الطريق كويس وبلاش فتوى ياجدعان .